Бүгінде қоғамымызда ұстаздардың жағдайына алаңдамайтын азаматтар кемде кем болар. Барлығының ойы – педагогтардың қоғамдағы орнын айқындап, олардың мәртебесімен қатар, еңбекақыларын көтеру. Осындай ұсыныстардың бірі мәжіліс депутаттары тарапынан айтылды. Халық қалаулырының айтуынша ұстаздарға  пайызсыз несие беру қажет екен.

Сонда ұстаздар өздері таңдаған мамандықты тастамай, аталмыш шара кадрлардың тұрақтауына септігін тигізеді. Парламент мәжілісінің біріккен отырысында депутат Жанат Омарбекова мұғалім мамандығының беделін арттыру мақсатында  мұғалімдерге пайызсыз несие беруді ұсынды.

Мәжіліс депутаты бұл ұсынысты халықаралық тәжірибеге сүйеніп айтып отыр. «Халықаралық тәжірибені алып қарасақ, мұғалімдерге пайызсыз несие беру – оларды сол мамандықта ұстап тұру үшін таптырмас шара», — деді Омарбекова. Оның айтуынша, бұл амал елдегі мұғалім кадрларының тұрақтауына ықпал етеді.

Айта кетейік, кадрлардың тұрақтамауы туралы тағы бір халық қалаулысы Наталья Жұмаділдаева да сөз қозғаған еді. Оның пікірінше, кадрлардың тұрақтамауын ұлттық деңгейде есепке алу керек. «Қазіргі уақытта мұндай есеп жүргізіліп жатқан жоқ. Деректердің жоқтығынан бұл ахуал туралы, проблемалар мен мамандықты тастау себептері жайында біле алмаймыз. Бұл ұстаздың беделін көтеру үшін тиісті шаралар қабылдауға кедергі келтіреді», — дейді Жұмаділдаева.

Депутаттың мәліметіне сүйенсек, кадрлардың тұрақтамауына ұстаздардың жалақысы мен еңбек ету жағдайына көңілі толмауы себеп болады. «Айта кетсек, білім беру жүйесіндегі кадрлардың тұрақтамауына халықаралық формуламен баға беретін болсақ, біздің елде кем дегенде, мұғалімдердің 1 проценті басқа салаға ауысар болса, жарты миллиард теңге шығынға ұшыратады», — деп алаңдайды мәжіліс депутаты.

Мұғалімдердің беделін арттыру қажеттігі туралы Қазақстан президенті Нұрсұлтан Назарбаев 10-қаңтардағы жолдауында айтқан болатын.

ОСТАВЬТЕ ОТВЕТ

Please enter your comment!
Please enter your name here